DFM News: Relasiona Selebrasaun Balibo Five Ba Dala 50, Ministru Komérsiu Indústria, Nino Pereira loke Feira produtu lokal ne’ebé loke Feira iha eventu selebrasuan tinan 50 trajedia Balibo.
Iha abertura feira, Ministru Komérsiu Indústria no Ambiente, Nino Pereira hateten, promosaun feira produtu lokál ne’ebé konsidera ho selebrasaun tinan 50 trajédia Balibo five ne’e, fó oportunidade ba to’os nain sira hodi promove ninia produtu hodi kontribui ba ekonomia uma laran.
“Ita hakarak liberdade ne’ebé mak iha totál no kompleta, ita hakarak soberanu ba iha ai-han, ita hakarak iha soberanu ba ita nia ekonomia, soberanu ba iha ita nia polítiku. Tanba ne’e hanesan esforsu koletivu ne’e sai hanesan sasukat ida hodi ita bele hare katak ita iha diresaun ida-ne’ebe mak los,”dehan Membru Governu ne’e liu huisi diskursu, Kampung Balibo Vila, Sigunda (13/10/2025).
Governante ne’e afirma, eventu ida selebrasaun Balibo five la’ós de’it sai hanesan istória maibé iha nia valór ekonómika ba maluk sira hodi bele mai promove produtu iha fatin ne’e.
Reprezentante Prezidente Conselho de Imprensa de Timor-Leste, Konsileira Isabel Maria Fernandes, hatete, atu valoriza agrikultór sira nia servisu, sira mak eroi verdadeiru ne’ebé ho esforsu no dedikasaun tomak prepara ai-ha liu-husi sira nia liman badinas.
“Feira ne’e la’os de’it fatin atu fa’an ka sosa produtu sira, maibé feira ida ne’ebé marka simbolu sustentabilidade no solidariedade, bainhira ita sosa produtu lokál ita hahú fó apoiu ba família iha komunidade laran no haforsa ekonomia nasaun,”hatete Konsileira ne’e.
Konselleira ne’e dehan, loron mundiál alimentasaun ne’ebé sei selebra iha loron 16 fulan outubru, tanba ne’e valoriza buat ne’ebé rai rasik, bainhira hili produtu lokál,hili futuru ne’ebé di’ak liu, futuru ho saúde di’ak liu, oportunidade barak liu no respeita bo’ot ba natureza rasik.
Remata Serimónia, Konsellu Imprensa akompaña konvidadus vizita foto jornalizmu hetan esplikasaun sira konaba istória ne’ebé helik iha imazen refere.
Serimónia abertura ne’e hetan partisipasaun husi, autóridade Lokál, Komadante Polísia Nasionál, membru FALITIL Forsa Defeza, komunidade inklui konvidadus sira.
Jornalista:Ligia Noronha
