DFM News:Iha Sigunda semana ne’e Estudante Ensinu Superior balun halibur malu hodi halo protesta ba dosente ne’ebé deskonfia halo asedu Seksuál ba estudante feto balun, estudante sira haruka dosente ne’e tenke aruma nia sasan sai husi fatin refere, tanba estudante konsidera dosente ne’e la merese atu sai manorin na’in ne’ebé di’ak.
Relasiona ho kazu Asedu Sexuál ne’e Sekretária Estadu Ba Igualidade la tolera ba aktus ne’e no tenke prosesa tuir lei ne’ebé iha, tanba governu kria ona kondisaun ba feto sira signifika zero toleransia ba Suspeitu ne’ebé involve kazu refere.
“Ami la tolera asedu Seksuál iha instituisaun públiku ami mantein pozisaun ida ne’e, ami mós apresia ba estudante sira ne’ebé iha korazem hodi koalia sai aktu ida ne’ebé sira ultrapasa,”hatete Governante ne’e ba jornalista sira iha Salaun Maria Gorette, Kaikoli Dili, Tersa-feira (7/10/2025).
Maske todán tebes ba maluk feto sira atu koali sai, maibé denunsia ona fiar katak kazu ne’e sei la’o ba oin.
Tanba SEI hamutuk ona Sekretaria Estadu Ensinu Superior iha hela kooperasaun ida hamutuk ho Institutu Superior sira atu bele introdus Zero teleránsia ba asedu seksuál ba iha Ensinu Superior sira.
Kona-ba asedu Seksuál Universidade sira halo hela sosializasaun ba kestaun ne’e, tanba kampus sai fatin ne’ebé seguru ba maluk feto sira hodi halao sira nia estudu tenke livre husi tipu violénsia bazeia ba Jeneru, livre husi buling no asedu Seksuál.
“Ami kondena tebes dosente ne’ebé halo asedu Seksuál hasoru estudante feto sira, sira uza poder ne’ebé iha atu ameasa foti vantazem husi sira nia pozsisaun fo valor ne’ebé di’ak ladiak,”tenik Elvina Sousa.
Ezekutiva ne’e esplika, Vitima sira ne’ebé barani koalia sai tanba sira kompriende no esforsu ne’ebé di’ak parte sosiedade sivil sira halo advokasia makas ba asuntu ne’e ema la tauk atu koalia sai lia los.
Antes ne’e governu liuhusi Ministériu Ensinu Superior no Kultura ho Ajénsia Internasionál KOICA UN-Women asina plaka hodi estabelese ona zero toleransia ba asedu Seksuál iha ensinu Superior sira ne’ebé eziste.
Jornalista: Eufrasia da Costa ho Xistu Punef
