DFM News: Hari’i radiu komunidade iha postu administrativu Balibo nu’udar mehi ne’ebé komunidade Balibo sira hein durante tinan barak nia laran, maibe ikus mai, mehi sai ne’e realidade bainhira Sekretáriu Estadu Komunikasaun Sosiál (SEKOMS), fó apoiu tékniku no finanseiru hodi harii rádiu komunidade ho naran ‘Rádiu Fronteira Balibo’.
Rádiu Fronteira Balibo ne’ebé lansa iha loron 15 fulan Outubru 2025, hodi fó homenazem ba jornalista na’in lima ne’ebé mate iha Balibo iha tinan 50 liuba (1975).
Sekretária Estadu Komunikasaun Sosial, Expedito Loro Dias Ximenes, hateten, jornalista australianu na’in 5 ne’ebé mate iha Balibo tan de’it hakarak públika injustisa ne’ebé timoroan sente.
“Ezisténsia Rádiu labele sai fali instrumentu ba propaganda balun ne’ebé la apoiu komunidade, tanba rádiu komunidade nia papel prinsipal mak atu atende komunidade,”dehan governante ne’e ba jornalista sira, bainhira partispa lansamentu rádiu iha Balibo Vila, Kuarta (15/10/2025).
Governante ne’e, afirma, bainhira komunidade susesu iha atividade ekonomika ruma papel radiu komunidade mak tenke promove hodi fó sai ba públiku.
SEKOMS rezista rádio komunidade hamutuk 22 mak eziste iha teritorium laran tomák, governu fó preoridade ba radiu komunidade tanba sira mak liña frente ba informasaun komunidade tanba kria rasik husi sira.
Jornalista: Ligia Noronha
