DFM News: Kanalizasaun Bee-moos iha Postu Administrativu Balibo Vila, Munisipiu Bobonaro la asesu bee-moos durante fulan haat, tanba kompañia kanalizadora Lahara halo servisu tarde, komunidade tenke sosa bee-moos hodi konsumu no utiliza ba nesesidade seluk.
“Komunidade sira iha Balibo Vila tenke la’o sai fali ba Aldeia Aloka no Buileku hodi kuru bee-moos. Sira ne’ebé iha transporte ne’e di’al, maibé balun susar tanba la iha transporte,” Xefe Suku Manuel da Cruz, hato’o komunidade ninia preokupasaun ba jornalista sira, iha nia knàr fatin Balibo Vila Segunda (13/10/2025).
Xefe Suku ne’e argumenta, tuir akordu ne’ebè governu ho kompañia selebra, lolos kanalizasaun bee-moos ne’e inisia nia kanalizasaun iha fulan Jullu no konklui iha fulan Setembru maibé estende ba fulan Outubru ne’e.
Autoridade lokal rekomenda ba parte kompetente atu orienta kompañia hodi aselera prosesu kanalizasaun hodi benefisia konsumudores.
Iha Balibo Vila, la’os komunidade hotu-hotu tenke sosa bee-moos maibé iha komunidade balun laiha kbiit sosa.
Maria dos Santos, rekorda, antes inisia kanalizasaun bee-moos, komunidade la susar ba bee-moos, maibé oras ne’e komunidade la asesu bee-moos.
“Durante ne’e Ami ba buka bee iha Aldeia seluk ne’ebé iha bee hodi kuru, ha’u la sosa bee tanba oan sira ba mak ba kuru de’it” nia lamenta.
Komunidade Faan Bee-moos, Zeronimo Soares, ba kuru bee-moos iha Aldeia Belola hodi ba faan ba komunidade ne’ebé presiza.
“Dalaruma ami mos ajuda sira ne’ebé laiha transporte ba buka bee-moos. Ami fó gratuira de’it”, nia esplika.
Suku Balibo Vila, iha total populasaun 2.000 husi uma kain 500, aldeia 4, kompostu hosi Aldeia Aitara, Aman Dato, no Fatululik mak la asesu bee mos.
Jornalista: Ligia Noronha
