Maubise-Média DFM: Mudansa klimátika (bailoron naruk) iha munísipu Ainaru Postu Administrativu Maubisse, halo ai-fuan Strawberry nia fuan kiik no produtor sira labele faan iha merkadu lokal.
Xefe Grupu Produtór Aifuan Strowberry, Domingos Nunes hatete, tinan rua ona produsaun aifuan Strawberry ladun fó fuan di’ak ona tanba mudansa klimátika ne’ebé afeta ai-fuan.
Aifuan strawberry nudar aifuan ne’ebé sensitivu tebes tanba bainhira udan makas, halo nia fuan dodok no bainhira bailoron naruk, halo nia fuan sai kiikoan.
“Maske ami hasoru difikuldade maibé ami nia grupu la lakon esperansa ami nafatin iha vontade hodi kontinua ami nia produsaun,”dehan Xefe grupu ne’e ba jornalista sira hafoin hetan vizita husi Sekretáriu Estadu Kooperativa (SEKOP) Arsenio Pereira da Silva, iha toos laran Maubise Vila, Tersa (12/08/2025).
Grupu Produtór aifuan Strawberry ne’e harii iha tinan 2016 ho nia membru 19, hetan apoiu husi ekipa Avansa Agrikultór, no iha 2019 sira hahú fornese ona ba iha Supermerkadu loja agrikultór sira iha Dili laran.
Nia konta, iha 2020 kada semana kolleta modo dala tolu hetan 100kg, kada kilo folin $4, no iha tinan 2021 komesa faan ona iha kotak ki’ik ho folin $1.50 no boot $2,50. Kada semana hetan osan to’o $200 ba leten, rezultadu husi faan ne’e konsege sosa kareta ida no halo mós uma.
Aleinde aifuan Straowberry, grupu ne’e mós kuda modo, hodi fornese mós ba eskola sira hodi apoia programa merenda escolar.
Maske okupadu ho eskolah maibé nia uza tempu balun hodi nafatin servisu iha grupu ne’e tempu Sabadu no Domingo nia lori produtu modo ba faan direta iha Merkadu Manleuan no Taibesi no faan liuhusi Sosial média no nia konsege remata eskola iha área Téknika Informátika.
Jornalista: Ligia Noronha
